मात उदर के मांयने , जान सक्यो नह जात


मात उदर के मांयने , जान सक्यो नह जात ।।
ऐहि बाद में आत , समझ धरम री शामळा ।।52।।
जांत पांत रो जगत में , ऐह वध्यो अपवाद ।
मिनख पणो मरजाद , साबत राखो शामळा ।।53।।
सब धरमों रो सार हैं , मानव धरम महान ।
जुग भूले क्युं जान , साचपणा ने शामळा ।।54।।
कबहू बड़ो न कोय , मिनखां साची मांनल्यो ।
दाम ओहदो दोय , सहविध दीसे शामळा ।।55।।
अविनाशी रो अंश एक ,प्रकृति साथ पच्चीस ।
वा हित विसवावीस , सुध गुण भूले शामळा ।।56।।
नित रटतां मुख नाम , बुगलां ज्यु नित साध बण ।
(पण)हिय सूं गई न हाम , सुन्दर तणी ज शामळा ।।57।।
मांस पियालो मेहळा , चित में माया चाह ।
नटवर दीसे नाह , (ओ) सत मग बहतां शामळा ।।58।।
राधे आशाराम  , गुरमीत जिसड़ा अवगुणी ।
बहुते कर बदनाम , साधपणा ने शामळा ।।59।।
जो समझे सो जाणसी , साच आखरां सोय ।
हठधरमी नह होय , सुण कर राजी शामळा ।।60।।
कृतघनी बदकार , चुगल जुआरी चोरटा ।
कीध दूर किरतार , सोय ओगुणी शामळा ।।61।।
धिन समता चित धार , नर ढिग औगुण ना रहे ।
(जद) होसी तारणहार , साचां ने झट शामळा ।।62।।
रति न पासे राख , कूड़ कपट री कोथळी ।
नर जो अळगी नांख , (तो) साच पियारो शामळा ।।63।।
कीध फिकर नह कांय , होणी सो हर हाथ हैं ।
छोगाळा कर छांय , सह दासां पर शामळा ।।64।।
हुवै नहीं नर हाथ , बाथ भरे मत बोहळी ।
सायब तूं समराथ  , साथ रहण हैं शामळा ।।65।।
मीठा मीर डभाल

Post a Comment

Previous Post Next Post